Jaunaren Jaiotzako zortziurren barruko domekan
FAMILIA
SANTUA:
JESUS,
MARIA ETA JOSE
A B C urteetan
Abenduaren 25etik
urtarrilaren 1a bitartean domekarik ez datorrenean eta, horregaitik, jai hau
abenduaren 30ean ospatuko danean, Ebanjelioaren aurretik irakurgai bakarra
aldarrikatuko da.
Jai hau domekan ospatuko
danerako, badira aukerako I. eta II. irakurgaiak, B urterako, eta C urterako.
I. Irakurgaia
Jaunari
begirune deutsonak
goresten
ditu bere gurasoak.
Siraken liburutik
Si 3, 3-7. 14-17a (gr. 2-6. 12-14)
Jaunak
seme-alaben gainetik ohoratzen dau aita,
eta
amaren aginpidea ezartzen bere umeen gain.
Aita
ohoratzen dauanak bere pekatuak ezabatzen ditu,
eta ama
goresten dauanak ondasunak pilotzen.
Aita
ohoratzen dauanak poza izango dau bere seme-alabengan,
eta
otoitz-egunean entzun egingo deutso Jaunak.
Aita
ohoratzen dauana luzaro biziko da,
eta
Jaunari obeditzen deutsonak atsegin emoten deutso amari.
Ene
seme, zaindu aita zahartzaroan
eta ez
emon nahigaberik bizi dan artean;
burua
galtzen hasten bada be, izan parkabera
eta ez
baztertu bizi dan bitartean;
aitari
emondako laguntza ez da ahaztuko,
pekatuen
ordain izango dozu.
Atsekabealdian
gogoan izango zaitu Jaunak.
Jaunak esana.
Erantzun salmoa
Sal 128 [127], 1-2. 3. 4-5 (R/. ik. 1)
R/. Zorionekoa Jaunari begirune deutsona,
haren
bideetan dabilana!
V/. Zorionekoa Jaunari begirune deutsona
eta
haren bideetan dabilana!
Zeure
lanaren frututik dozu jango,
zoriontsu
izango zara eta ondo zara biziko. R/.
V/. Emaztea mahatsondo emonkorraren antzeko
zure
etxe barruan;
seme-alabak
olibondo-kimuen antzeko
zure
mahai inguruan. R/.
V/. Hara zelan izango dan bedeinkatua
Jaunari
begirune deutsona!
Bedeinkatu
zagizala Jaunak Siondik,
gozatu
zaitezala Jerusalemen zorionaz
zeure
bizitzako egun guztietan. R/.
II. Irakurgaia
Familiako bizitza Jaunagan bizia.
San Paulo Apostoluak Kolosarrei egindako epistolatik
Kol 3, 12-21
Senideok: Jantzi zaiteze bihotz errukitsuz,
onberatasunez, apaltasunez, otzantasunez, eroapenez, Jainkoaren herri
aukeratua, santua eta maitea zarien ezkero. Eroan egizue ondo alkar eta parkatu
batak besteari, inork inoren aurka ezer baleu. Jaunak parkatu eutsuen lez,
parkatu zuek be alkarri. Eta horreen guztien gainetik, izan maitasuna, hori
da-eta alkartasun betearen lokarria. Kristoren bakeak agindu begi zuen
bihotzean, bake horretara deituak zarien ezkero gorputz baten, eta izan esker
oneko.
Bizi bedi oparo zuengan Kristoren hitza;
irakatsi eta aholkatu jakituria osoz; kantatu Jainkoari bihotzez eta esker onez
salmoak, gorazarreak eta kantu inspiratuak. Edozer esaten nahiz egiten dozuela,
egizue dana Jesu Kristo Jaunaren izenean, haren bidez Jainko Aitari eskerrak
emonez.
Emazteok,
zagoze zeuen senarren menpe, Jaunaren jarraitzaileei dagokien lez. Senarrok,
maitatu egizuez zeuen emazteak, eta ez izan gogor eurekin. Seme-alabok, egin
zeuen gurasoen esana gauza guztietan, hori nahi dau-eta Jaunak. Gurasook, ez
sumindu zeuen seme-alabak, gogoa galdu ez dagien.
Jaunak esana.
Aleluia
Kol 3, 15a. 16a
R/. Aleluia.
V/. Kristoren bakeak agindu begi zuen bihotzean;
bizi
bedi oparo zuengan Kristoren hitza. R/.
C urtean
Ebanjelioa
Gurasoek irakasleen artean aurkitu eben Jesus.
✠ Jesu Kristoren Ebanjelioa San Lukasen liburutik
Lk 2, 41-52
Jesusen gurasoak Jerusalemera joaten ziran
urtero erromes Pazko-jaietan. Jesusek hamabi urte bete zituanean, Jerusalemera
igon eben jaietara, ohitura zan lez. Jaiegunak amaiturik gurasoak etxerantz
abiatu ziranean, Jesus umea Jerusalemen gelditu zan, eurak jakin barik.
Erromeskideen artean etorrelakoan, egun bateko bidea egin ostean, haren bila
hasi ziran taldeko senideen eta ezagunen artean. Eta aurkitzen ez ebenez,
Jerusalemera bihurtu ziran haren bila.
Hiru egunen buruan, tenpluan aurkitu eben,
irakasleen artean jesarrita, hareei entzuten eta itaunka. Entzuten eutsoen
guztiak harrituta egozan erantzunetan erakusten eban argitasunagaitik.
Gurasoak, ikusi ebenean, zur eta lur gelditu ziran, eta amak esan eutson:
«Seme, baina zergaitik egin deuskuzu hori? Begira zelako atsekabez ibili garan
aita eta biok zure bila!» Harek erantzun eutsen: «Zergaitik ibili zarie nire
bila? Ez ete zenkien Nik neure Aitaren etxean egon behar dodana?» Hareek,
ostera, ez eben ulertu zer esan gura eutsen.
Jesus Nazaretera jatsi zan eurakaz, eta euren
menpean bizi zan. Haren amak bere bihotzean gordetzen zituan gauza honeek
guztiok.
Jesus, barriz, aurrera joian jakiturian,
gorpuzkeran eta grazian, Jainkoaren eta gizon-emakumeen begietan.
Jaunak esana.
Aukerako irakurgaiak
FAMILIA SANTUA:
JESUS, MARIA ETA JOSE
C urtean
I. Irakurgaia
Bizitza osorako
Jaunari eskeinia gelditu Samuel.
Samuel lehenengo liburutik
1 Sm 1, 20-22. 24-28
Umedun geratu zan Ana
eta, sasoia betetzean, semea izan eban. Samuel ezarri eutson izena, esanez:
«Jaunari eskatua dot». Elkana senarrak, bere etxekoekin batera, Jaunari
urteroko oparia eskeintzera eta agindutakoa betetzera igon eban hurrengo urtean
be. Ez zala joango adierazo eutson Anak senarrari, esanez: «Umeari bularra
kendukeran eroango dot eta Jaunari aurkeztuko deutsat, eta han geldituko da
orduan betiko».
Anak Xilora, Jaunaren
etxera, eroan eban Samuel. Umea oraindino txikia zan, bularra kendu barria.
Eroan ebazan hiru urteko zekorra, zaku bat urun eta zaragi bat ardao be.
Zekorra oparitako hil eben, eta umea Eli abadeari eroan eutsoen.
Anak esan eban: «Parkatu,
ene jauna! Neu naz hemen, zure aurrean, Jaunari otoitzean egondako emakume ha.
Ume hau eskatu neutsan, eta Jaunak emon deust eskatu neutsana. Horregaitik,
Jaunari eskeintzen deutsat; bizitza osorako Jaunari eskeinia gelditzen da».
Eta bertan Jauna gurtu
eben.
Jaunak esana.
Erantzun salmoa
Sal 84 [83], 2-3. 5-6. 9-10 (R/. ik. 5a)
R/. Zorionekoak, Jauna, zure etxean bizi diranak.
V/. Bai maitagarria zure egoitza,
Jaun
ahalguztiduna!
Nekatzen
dihardut barrua,
Jaunaren
tenpluko atarien gogo beroz.
Nire
bihotzak eta gorputzak
poz-oihu
dagioe Jainko biziari. R/.
V/. Zorionekoak zure etxean bizi diranak
eten
barik Zu goresten!
Zorionekoak
euren indarra Zugan dabenak,
erromesaldiak
gogoan erabiltzean! R/.
V/. Jauna, Jainko ahalguztiduna, entzun nire
otoitza,
Jakoben
Jainkoa, makurtu belarria.
Oi
Jainko, gure babesle hori,
begiratu
zuk igurtzitakoaren aurpegiari. R/.
II. Irakurgaia
Jainkoaren seme-alaba izena daroagu,
baita izana be.
San Joan Apostoluaren lehenengo epistolatik
1 Jn 3, 1-2. 21-24
Seme-alaba maiteok:
Begira zenbaterainoko maitasuna agertu deuskun Aitak, Jainkoaren seme-alaba
izena daroagu-eta, baita izana be. Hona zergaitik munduak ez gaituan ezagutzen:
Aita be ezagutu ez ebalako. Ene maiteok, orain Jainkoaren seme-alaba gara; gero
izango garana oraindino ez da agertu. Badakigu, Kristo agertuko danean, haren
antzeko izango garala, dan lakoa ikusiko dogu-eta.
Ene maiteok, barruak
errudun garala esaten ez badeusku, uste osoa dogu Jainkoagan. Seme-alaba
maiteok: Eskatu ahala guztia hartzen dogu Jainkoagandik, haren aginduak
betetzen doguzalako eta hari atsegin jakona egiten. Eta hauxe da haren agindua:
haren Seme Jesu Kristoren izenean sinistu eta alkar maitatu dagigula, harek
agindu euskun lez. Haren aginduak betetzen dituana Jainkoagan dago eta Jainkoa
harengan. Honan dakigu gugaz dagoala: emon deuskun Espirituaren bidez.
Jaunak esana.
Aleluia
Ik. Eg 16, 14b
R/. Aleluia.
V/. Edegi, Jauna, gure bihotza,
gogoz
onartu daiguzan zure Semearen hitzak. R/.
Ebanjelioa
Gurasoek irakasleen artean aurkitu eben Jesus.
✠ Jesu Kristoren Ebanjelioa San Lukasen liburutik
Lk 2, 41-52
Jesusen gurasoak
Jerusalemera joaten ziran urtero erromes Pazko-jaietan. Jesusek hamabi urte
bete zituanean, Jerusalemera igon eben jaietara, ohitura zan lez. Jaiegunak
amaiturik gurasoak etxerantz abiatu ziranean, Jesus umea Jerusalemen gelditu
zan, eurak jakin barik. Erromeskideen artean etorrelakoan, egun bateko bidea
egin ostean, haren bila hasi ziran taldeko senideen eta ezagunen artean. Eta
aurkitzen ez ebenez, Jerusalemera bihurtu ziran haren bila.
Hiru egunen buruan,
tenpluan aurkitu eben, irakasleen artean jesarrita, hareei entzuten eta
itaunka. Entzuten eutsoen guztiak harrituta egozan erantzunetan erakusten eban
argitasunagaitik. Gurasoak, ikusi ebenean, zur eta lur gelditu ziran, eta amak
esan eutson: «Seme, baina zergaitik egin deuskuzu hori? Begira zelako atsekabez
ibili garan aita eta biok zure bila!» Harek erantzun eutsen: «Zergaitik ibili
zarie nire bila? Ez ete zenkien Nik neure Aitaren etxean egon behar dodana?»
Hareek, ostera, ez eben ulertu zer esan gura eutsen.
Jesus Nazaretera jatsi
zan eurakaz, eta euren menpean bizi zan. Haren amak bere bihotzean gordetzen
zituan gauza honeek guztiok.
Jesus, barriz, aurrera
joian jakiturian, gorpuzkeran eta grazian, Jainkoaren eta gizon-emakumeen
begietan.
Jaunak esana.
GABON OSTEKO DOMEKEA
(FAMILIA SANTUA)
Hitzaldia
Senideok: Gabon egun osteko domekan, Eleizeak Familia Santua gogoan hartzera gonbidatzen gaitu. Egun honetako Liturgiak sinismena azpimarratzen dau, eta honen garapena. Ez dira bardinak Itun Zaharreko sinismena eta gurea. Ez leuke bardinak izan behar, behintzat. Bitartean Jainkoa gizon eginaren misterioa dagoalako.
Batzuentzat, sinismena, Jainkoari eskatzea, eta harengandik lortzea litzateke. Eta, horretarako, inori kalterik ez egitea, ona izatea, eta Jainkoari, haren ordez, zeozer eskeintzea.
Baina hemen ikusi doguna beste gauza bat da: Jainkoari adi-adi egotea. Jainkoari adi dago Abrahan; adi dagoz, ohiturak betez, Jose eta Maria; eta adi dagoz, itxaroten Simeon eta Ana. Hau bai sinismena: Jainkoari adi egotea.
Lehengo sinismenean, Itun Zaharrekoan esango geuke, nahikoa izango litzateke, gaur egungo familien egoerea ikusita, Jainkoari hareen alde eskatzeaz.
Baina Itun Barriko sinismenak, Jainkoari adi egoten dakianak, harek zer dinoskun entzutea, eta dinoskunagaz konprometitzea eskatuko leuke.
Harrituta bagaukez gaur egun ikusten doguzan familiek, hareetan Jainkoaren ahotsa eta nahia entzuten eta aurkitzen jakin behar izango geuke. Zein errez ezeztatzen doguzan beti ezagutu dogun erara moldatzen ez diran familiak! (Aurretik banandutakoez osotu diralako; edo andrazko bik edo gizonezko bik egiten dabelako guraso; edo, aita edo ama bakarrean izan gura dabelako; eta abar).
Jainkoak era askotakoak egin bagaitu, ez ete geuke alkar onartu behar, alkarri lagundu behar, bakotxaren onurak alkarbanatu behar…?
Ea eredu hartzen doguzan Jainkoaren irakatsiei erantzun gura deutseen Jose eta Maria; haren agintzarien betetea itxaroten dauan Simeon; eta hareen barri poztasunez emoten eban Ana.
Gaurko sinismena litzateke Jainkoari adi egotea, haren berbea alkarregaz ospatzea, eta, alkarregaz, sinistun familia eratzea, batabesteen ezbardintasunak alkarregaz eroaten jakinez.
Horretarako, otoitzean indar hartuz.
Ikasi daigun Mariagandik: ulertzen ez ebazan gauzak barruko isiltasunean, otoitzaren errotan, eihoten ebazan.
(LAGUNGARRIAK)
GABON OSTEKO I. DOMEKEA /C
(Familia Santua)
Sarrera oharra
Senideok: Jainko Seme gizon eginari ondo etorria egin ondoren eta gure artean leku egin ondoren, Gabonetako misterioak Nazareteko Familian sartu gura gaitu, bertan aurkitzeko Jainkoak guretzat gura dauzan giza hartu-emonak. Begiak Belengo estalpean, eta entzumena Jainkoaren hitzean jarrita, goazen alaitasun guztiaz Jainkoaren bila gure etxeko ateak zabaldurik.
Sarrera-abestia
Gora, gora, gora hotsegin
Alaitasun ta
txaloekin, guztiok poztu eragin.
Agertu da
Jaungoikoa, Mariagandik sortua (bis).
Gazteok, arren, abestu: Jaiobarria goraldu,
abots batez eupatu!
Agertu da Jaungoikoa, Mariagandik sortua (bis).
Izan bedi onetsia Gizonen salbatzailea
hobenen kentzailea.
Agertu da Jaungoikoa, Mariagandik sortua (bis)
Abadearen agurra
†
Aitaren eta Semearen eta Espiritu santuaren izenean.
—Amen.
†
Gure artean gizon jaioaz gure bizitza alaitasunez, argiz eta itxaropenez
janzten dauan Jauna izan bedi zuekin.
—Eta
zure espirituarekin.
Aintzarako oharra
Belengo estalpean abesten daben Aingeruekaz alkartu daigun gure ahotsa Jainkoaren aintza izadi osoagaz batera abesteko eta gure barruak eta ingurua alaitzeko:
* Aintza zeruan Jainkoari.
—Aintza zeruan (3) Jaunari, eta bakea (2) lurrean gizonari (bir).
1. Handi ta eder zaitugulako gora zu!, eskerrak zuri;
zure
Semea gu salbatzera bialdu dozu gugaitik.
2.
Gugaitik jaio, gugaitik bizi,
gugaitik, Jesus, hil zinan;
gugaitik
gora, bizturik zara Jainko Aitaren argitan
Si 3, 3-7
Gizakiak bere oinarriak eta babesa familian
jarten dauzanean ha zaindu egin behar dau, eta zainketa hori Jainkoaren gurari
lez onetsiko dau. Hauxe dogu deigarri. Argituko ete dau irakurgai honek gaur
egungo gure familia-eredua?
Erantzun salmoa
Salmisteak Jainkoa lagun modura hartzen
dau; ez deutso etxe-bizitzan eragozpenik egiten; bai, ordea, dauala lagungarri.
Bat egin daigun beragaz, otoizgiroan.
R/. Zorionekoa Jaunari begirune deutsona
Haren bideetan dabilana.
Kol 3, 12-21
Danok dakigu zein gatxak egiten jakuzan
hartu-emonak etxe barruan batez ere, edo bikotearen sailean, edo eguneroko
lanean… Zeozer ez ete dau eskatzen gure barruak alkarregaz bakez bizi izateko?
Ea aintzat hartu geikezan Paulo apostoluaren aholkuak.
Ebanjelioa (Lk 2, 41-52)
Egin deiogun harrerea Nazareteko Familia
gora-beheratsua eredu emongo deuskun ebanjelioari Aleluia abestuz, zutunik.
ESKARIAK
† Hirutasunean familia bakar danagana joten
dogu gure arazoak eta amesak eta eskariak berari aurkezteko:
—Elizearen alde: arazo handien artean bizi diran familien ondoan egoten jakin daian, eta hareentzat argi, laguntza eta adore izan daiten, egin daigun otoitz.
—Gizaki guztiok eratu behar izango eta gura izango geuken familia bakar, alkarrentzako begiramenduna eta alkarri laguntzekoa, eraikitzen jardun daigun pandemia-gatx honek adoreturik, egin daigun otoitz.
—Aita santuaren berbak aintzat hartuz, ez daigun lehiara jo edo nor-gehiagokara, egoera honi alkarregaz erantzun behar deutsagula gogoan izatera baino, egin daigun otoitz.
—Gaurko familiek seme-alabak eukiteko eta hareik maitatzeko eta hezteko erea izan daien, eta baita honek eskatzen deutsen ausardia eta adorea ere, egin daigun otoitz.
—Kristau alkartetik autokritika egiteko gauza izan gaitezan, gure ziurkerietatik urteten ahalegindu, eta ebanjelioko argitasuna eta poztasuna zabaltzeko alkar adoretu daigun, egin daigun otoitz.
† Nazareteko Familiaren irri-barreaz beteten gaituzun Jainko maitalea: izan gaitezala gure familietako poz-iturri. Jesukristo gure Jaunaren bitartez.
—Amen.
Jaunartzerako
1 Gau erdian Zu zara distira argizkoa,
isiltasun
osoan hor zure mintzoa.
R/. Maitasun-agerpen!
Isiltasun osoan Hitza gizon sortzen.
2 Urratu da mundutik ilunpe itxia,
sortuazoz
zerutik Zuk argi barria.
OHARRAK
Azkenerako abestia
Agur, Maria Belengo, Jesus haurrarekin.
Agur, graziaz
betea, Jauna da zurekin.
1. Jauna
ta Jesus da zure sabeleko frutu;
andra guztien artean bedeinkatua zu.
2. Ama-semeak han dagoz hain apal, hain xume:
Ama, Andra Maria da, Jaungoikoa ume. R/.
3. Santa Maria Birjina, Jainkoaren Ama,
Otoitz egin gure alde, Zagoz guregana. R/.
4. Zure beharrean gagoz, Ama, betiere;
Heriotzako orduan batik bat halere. R/.
OTOITZA
Nazareteko Familia emoten deuskuzu eredu
Jauna;
hantxe egiten zaralako bat gure izateaz,
hantxe aurkitu dozulako leku
Mariaren apaltasunari eta baietzari esker.
Nazareteko Familia santua izan gura dot
argi
nire bizitzako ilunak argitu daizan,
zuri bai
erantzuten irakatsi deidan,
nire bizitzan leku zain daizun beti.
Ez daidala idealizatu familia eredu bakar
bat;
gaurko familia ereduei begiratzen jakin
daidala;
gaurko gizakien atsekabez eta zintzo
erantzun guraz
bat egin daidala eta zeuri aurkeztu
deizudazala,
zeu zaralako, Jauna, guztion onespen eta
helburu.
