Abendualdiko III. Domekea

ABENDUALDIKO III. DOMEKA

A urtean

 (Fray MARCOS)

I. Irakurgaia

Jainkoa bera dator zuek salbatzera.

Isaias Profetaren liburutik

Is 35, 1-6a. 10

    Poztu beitez basamortua eta lur agorra,
alaitu bedi eremua, eta lilia lez loratu,
jantzi bedi lorez eta egin begi irrintzi eta salto pozaren pozez.
Libano baizen zoragarri
eta Karmel mendia eta Xaron lautada baizen eder bihurtuko dira.
Ikusiko dabe Jaunaren aintza, gure Jainkoaren edertasuna.

Indartu egizuez esku ahulduak,
sendotu belaun makalduak;
esan bihotz-bildurtiei:
«Eutsi gogor! Ez bildur izan!
Horra zuen Jainkoa!
Berbera dator zuek salbatzera
eta merezi daben zigorra arerioei emotera».

Orduan, itsuen begiak edegiko dira
eta gorren belarriak zabalduko;
herrenak basahuntzak lez salto egingo dau
eta mutuaren mihinak oihu egingo pozez.

Jaunak askatuak pozez kantari etorriko dira Sionera:
amaibako alaitasuna hareen aurpegian!
Poza eta alaitasuna izango dabez lagun.
Nahigabeak eta negarrak ihes egingo dabe.

Jaunak esana.

 

Erantzun salmoa

Sal 146 [145], 6c-7. 8-9a. 9b-10 (R/. ik. Is 35, 4)

R/.   Zatoz, Jauna, eta salbatu gagizuz.

        Edo: Aleluia.

V/.   Betiko eusten deutso Jaunak bere leialtasunari.
        Zapalduen eskubideak defendatzen ditu,
        gose diranei ogia emoten deutse.
        Jaunak askatzen ditu presoak. R/.

V/.   Jaunak zabaltzen ditu itsuen begiak,
        Jaunak jasotzen konkortuak,
        Jaunak maitatzen zintzoak,
        Jaunak ditu etorkinak zaintzen. R/.

V/.   Umezurtzei eta alargunei zutunik deutse eusten,
        baina gaiztoen nagusitza iraultzen.
        Jauna errege da betieran,
        zure Jainkoa, Sion, errege gizaldien gizaldietan! R/.

 

II. Irakurgaia

Egon sendo, laster etorriko da-eta Jauna.

Santiago Apostoluaren epistolatik

St 5, 7-10

    Senideok: Izan egizue pazientzia Jaunaren etorrera arte. Begiratu nekazariari: lurraren frutu ederraren zain egoten da eta pazientziaz itxaroten ditu sasoiz datorren euria eta berandu datorrena. Izan pazientzia zuek be eta egon sendo, laster etorriko da-eta Jauna.
    Senideok, ez ibili bata bestearen aurka marmarka, kondenatu ez zagiezan; begiratu, epailea ate-atean da. Senideok, hartu egizuez sufrimentuaren eta pazientziaren eredutzat Jaunaren izenean berba egin eben profetak.

Jaunak esana.

 

Aleluia

Is 61, 1 (ik. Lk 4, 18an aitatua)

R/.   Aleluia.

V/.   Jaunaren Espiritua nire gainean dago,
        behartsuei Barri Ona emotera bialdu nau. R/.

 

Ebanjelioa

Zeu zara etortzekoa,
ala besteren baten zain egon behar dogu?

✠ Jesu Kristoren Ebanjelioa San Mateoren liburutik

Mt 11, 2-11

    Aldi haretan, Joan Bateatzaileak, kartzelan Kristoren egiteen barri izanik, bere ikasle batzuk bialdu eutsozan itauntzera: «Zu zara etortzekoa ala besteren baten zain egon behar dogu?»
    Jesusek erantzun eutsen: «Zoaze eta esan Joani entzuten eta ikusten dozuena: itsuek ikusten dabe eta herrenak badabiltz, legendunak garbi gelditzen dira eta gorrek entzuten dabe, hilak biztuten dira eta behartsuei Barri Ona iragartzen jake. Eta zorionekoa Nigaitik galbiderik hartzen ez dauana!»
    Hareek alde egitean, Joanen gainean berba egiten hasi jakon Jesus jenteari: «Zer ikustera urten zenduen basamortura? Haizeak astintzen dauan kainabera? Edota zer ikustera urten zenduen? Apain jantzitako gizona? Apain janzten diranak errege-jauregietan egoten dira. Zer ikustera urten zenduen, bada? Profetaren bat? Baietz dinotsuet, eta profeta baino be handiago dana. Horrexetaz dago idatzia Liburu Santuan:

    Begira, neure mezularia bialtzen dot zure aurretik,
    zuri bidea prestatzera.

    Bene-benetan dinotsuet: Ez da sortu amaren semerik Joan Bateatzailea baino handiagorik. Halan be, zeruetako erreinuan txikiena ha baino handiago da».

Jaunak esana.

 

 

(Fray Marcos)

ABENDUALDIKO III. DOMEKA

B urtean

 

I. Irakurgaia

Pozaren pozez nago Jaunagaz.

Isaias Profetaren liburutik

Is 61, 1-2a. 10-11

    Jainko Jaunaren espiritua nire gainean dago,
Jaunak igurtzi nau-eta.
Harek bialdu nau behartsuei barri ona emotera,
bihotz-urratuak osatzera,
katiguei amnistia iragartzera eta giltzapetuei askatasuna;
Jaunaren onginahi-urtea iragartzera.

Pozaren pozez nago Jaunagaz,
neure arima Jainkoagaz alai daukat,
salbazinoaz jantzi nau-eta,
garaipen-soinekoz estaldu,
koroa janzten dauan senargaia lez,
edergailuz apaintzen dan andragaia lez.
Lurrak landarea emoten
eta baratzeak hazia erneazoten dauan lez,
halan erneazoko dau Jaunak justizia eta gorespena
nazino guztien aurrean.

Jaunak esana.

 

Erantzun salmoa

Lk 1, 46-48a. 48b-50. 53-54 (R/. Is 61, 10b)

R/.   Neure arima Jainkoagaz alai daukat.

V/.   Handiesten dau nire arimak Jauna,
        pozaren pozez daukat neure barrua,
        Jainkoa da-eta nire salbazinoa,
        ikusi dau-eta mirabe honen ezereztasuna. R/.

V/.   Horregaitik, dohatsu deituko deuste gaurtik gizaldi guztiek,
        handiak egin deustaz-eta Ahalguztidunak;
        santua da haren izena,
        eta haren errukia gizaldiz gizaldi
        begirune deutsoenengana. R/.

V/.   Ondasunez bete ditu gose egozanak
        eta esku-hutsik bialdu aberatsak.
        Lagun etorri jako bere morroi Israeli,
        bere errukiaz gogoraturik. R/.

 

II. Irakurgaia

Zuen izate osoak –espiritu, arima eta gorputz–,
errubako iraun dagiala Jaunaren etorrera arte.

San Paulo Apostoluak Tesalonikarrei egindako lehenengo epistolatik

1 Ts 5, 16-24

    Senideok: Zagoze beti pozik. Egin otoitz aspertu barik; emon eskerrak beti, horixe nahi dau-eta zuentzat Jainkoak Kristo Jesusengan. Ez amatatu Espiritua, ez gitxietsi profeta-dohairik. Aztertu guztia eta hartu on dana. Zaindu zeuen buruak edozelako gaiztakeriatik.
    Bakea emoten dauan Jainkoak berak egin zagiezala oso-osorik santu, eta zuen izate osoak –espiritu, arima eta gorputz– errubako iraun dagiala, Jesu Kristo gure Jaunaren etorrera arte. Leiala da dei egin deutsuena, eta beteko dau emondako hitza.

Jaunak esana.

 

Aleluia

Is 61, 1 (ik. Lk 4, 18an aitatua)

R/.   Aleluia.

V/.   Jaunaren Espiritua nire gainean dago,
        behartsuei Barri Ona emotera bialdu nau. R/.

 

Ebanjelioa

Zeuen artean badozue ezagutzen ez dozuen bat.

✠ Jesu Kristoren Ebanjelioa San Joanen liburutik

Jn 1, 6-8. 19-28

    Agertu zan gizon bat, Jainkoak bialdua: Joan eban izena. Autormenerako etorria zan, argiaren autormena egitera, haren bidez guztiek sinistu egien. Bera ez zan argia, argiaren autormena egin behar ebana baino.
    Hauxe da Joan Bateatzaileak egin eban autormena, judeguek Jerusalemdik abadeak eta levitarrak bialdu eutsoezanean bera nor zan itauntzera.
    Joanek argi eta garbi autortu eban: «Ni ez naz Mesias». Hareek itaundu eutsoen: «Nor zara, bada? Elias ete zara?»
    Joanek erantzun: «Ez». Hareek, orduan: «Etortzekoa dan profeta ete zara?» Eta harek: «Ez».
    Orduan, esan eutsoen: «Nor zara, bada? Bialdu gaituenei erantzuna emon behar deutsegu. Zer dinozu zeure buruaz?»
    Joanek, orduan: «Ni, basamortuan oihuka diharduanaren ahotsa naz: “Zuzendu bidea Jaunarentzat”, Isaias profetak esan eban lez».
    Bialdutakoen artean batzuk fariseuak ziran, eta itaundu eutsoen: «Zergaitik bateatzen dozu, bada, ez bazara Mesias, ez Elias, ez etortzekoa dan profeta?»
    Joanek erantzun eutsen: «Nik urez bateatzen dot. Badozue zeuon artean, ostera, ezagutzen ez dozuen bat, nire ondoren datorrena; eta ni ez naz inor haren oinetakoen lokarriak askatzeko be».
    Hau guztiau Betanian gertatu zan, Jordan ibaiaz bestaldean, ibili be, bertan ebilen Joan bateatzen-eta.

Jaunak esana.

 

 

ABENDUALDIKO III.DOMEKA

"C" urtean

 (Fray MARCOS)

I. Irakurgaia

Jauna pozez saltoka dabil zugaitik.

Sofoniasen Profezia liburutik

So 3, 14-18a

Egin poz-irrintzi, Sion uri!
Egin oihu alai, Israel!
Poztu zaitez bihotz-bihotzez,
alaitu, Jerusalem!
Urratu dau Jaunak zure kontrako erabagia,
atzeratuazo ditu zure arerioak.

Jauna, Israelgo erregea, zure erdian dago;
ez zara gehiago ezeren bildur izango.
Egun haretan, honan esango deutsoe Jerusalemi:

 «Ez bildur izan, Sion!
Ez beitez jausi zure eskuak!
Jauna, zure Jainkoa, zure erdian dago salbatzaile indartsu!
Pozaren pozez alaitzen da zugaitik,
bere maitasunez bizibarritzen zaitu.
Pozez saltoka dabil zugaitik, jaiegunez lez».

Jaunak esana.

 

Erantzun salmoa

Is 12, 2. 3 eta 4bcd. 5-6 (R/. 6)

R/.   Egin poz-oihu,
        handikiro dihardu-eta zuen alde Israelgo Santuak.

V/.   Jainkoa dot salbatzaile!
        Badot uste on eta ez naz bildur,
        Jauna dot-eta indar eta kemen,
        bera neure salbazino. R/. 

V/.   Atarako dozue ura pozik
        salbazinoaren iturrietatik.
         «Eskerrak Jaunari, dei egin haren izenari,
        iragarri haren egintzak herriei,
        aldarrikatu zein bikaina dan haren izena. R/.

 V/.   Kanta Jaunari, bikain jokatu dau-eta,
        jakin begie honen barri mundu osoan.
        Egin poz-irrintzi eta oihu, Siongo bizilagunok,
        handikiro dihardu-eta zuen alde Israelgo Santuak». R/.

 

II. Irakurgaia

Hurrean da Jauna.

San Paulo Apostoluak Filipoarrei egindako epistolatik

Flp 4, 4-7

     Senideok: Zagoze beti pozik Jaunagan; barriro dinotsuet, zagoze pozik. Ezaguna izan bedi gizaki guztientzat zuen bihotz ona. Hurrean da Jauna. Ez izan ezeren kezkarik, ostera gorabehera guztietan agertu zeuen eskabideak Jainkoari, otoitz eta erregu eginez eta eskerrak emonez. Eta guk pentsatu geinkena baino handiagoa dan Jainkoaren bakeak gordeko ditu zuen gogo-bihotzak Kristo Jesusen bidez.

Jaunak esana.

 

Aleluia

Is 61, 1 (ik. Lk 4, 18an aitatua)

R/.   Aleluia.

V/.   Jaunaren Espiritua nire gainean dago,
        behartsuei Barri Ona emotera bialdu nau. R/.

 

Ebanjelioa      

Eta guk zer egin behar dogu?

✠ Jesu Kristoren Ebanjelioa San Lukasen liburutik

Lk 3, 10-18

     Aldi haretan, honan itauntzen eutson jenteak Joan Bateatzaileari: «Zer egin behar dogu?» Harek erantzuten eutsen: «Soineko bi dituanak emon beio bat ez daukanari, eta jatekorik daukanak egin begi gauza bera».

     Etorri jakozan zergalari batzuk be bateatzera eta itaundu eutsoen: «Maisu, zer egin behar dogu?» Eta harek esan eutsen: «Ez eskatu erabagita dagoana baino gehiago».

     Gudariek be itaundu eutsoen: «Eta guk zer egin behar dogu?» Harek erantzun: «Ez atara inori dirurik gogorkeriaz, ezta guzurrezko salaketaz be; ezpada ze, konformatu zaiteze daukazuen soldatarekin».

     Herria zain-zain egoan eta danak ziharduen pentsatzen ez ete zan Joan Bateatzailea Mesias izango. Joanek guztiei jakin eragin eutsen: «Nik urez bateatzen zaituet; baina badator ni baino ahaltsuago dana eta ni ez naz inor haren oinetakoen lokarriak askatzeko be. Harek Espiritu Santuaz eta suz bateatuko zaitue. Eskuan dauka sardea, larraina garbitu eta garia garautegietara batzeko; galtzua, barriz, amatatu ez leitekean sutan erreko dau».

     Honeen eta beste aholku askoren bidez, Barri Ona iragartzen eutson herriari.

Jaunak esana.

 

 

Hitzaldia

     Abendualdiko 3. domeka honetako mezua poztu gaitezala da; eta emoten deuskun arrazoia, Jainkoa hurrean dala.

     Pozik gagoz, senideok? Eta gure pozaren iturria Jainkoaren hurtasuna da? Zenbat bider autortu behar dogun ezetz: ez gagoz pozik; eta gitxiago da gure pozaren iturria Jainkoaren hurtasuna. Orduan? guzurretan dihardugu, ala badago beste arrazoirik? hauxe azken hau uste dot nik.

     Jainkoagazko gure hartu-emonak ez dira (ez deuskue-eta holan irakatsi) konfiantzazkoak, maitatu batek bere maiteagaz daukazan hartu-emonak lez. Jainkoak dana eta danean ikusten dauala, eta txarkeria zigortu egiten dauala eta ez dogula txarkeriarik egin behar… irakatsi deuskue. Eta, zer zan txarkeria? Legea edo Arauak edo Esanak urratzea edo ez betetea; baina ez Jainkoaren "argitasunetik", irribarretik, ihes egitea, eta hagaitik ilunpetan edo tristuran jaustea.

     Eta hauxe da Joan Bateatzaileak zabaltzen eta Jesusek zabalduko dauan mezuen arteko aldea: Bateatzaileak Jainko zigortzailea iragarten dau; haren zigorrari ihes egitea dagokigu; horretarako txarkeriatik aldentzea eta gure bizitzan on eginak ereitea dagokigu. Hortixik harengana hurreratzen ziranen galderak: guk zer egin behar dogu?

     Jesusek, alderantziz, beste mezu bat zabaltzen dau. Baina inork ez dau onartuko, edo ulertuko, antza; edo ez dau ulertu gura izango, hori ez dalako Jainkoaren irudi benetakoa, edo ordura arte ezaguna dana. Jesusek iragarten dauan Jainkoa erabili (manipulatu) ezina da: gizaki oro maite dauana; danak dira-eta bere seme-alaba. Zigortu ezin daikena da: maitasuna dalako. Dana parkatzen dauana da: parkamena dalako.

     Jainko hau ez dago gugandik urrun, geure artean baino. Horrexegaitik ez dauka inondik etorri beharrik, ez ezer emon beharrik, gu beragan garalako; haren biziak badihardualako gugan. Baina…

     Ze zentzun dabe, orduan, gure zatoz, Jauna! oihuek? Horen esangurea inondik etorri behar dauala bada, ez dabe ezelango zentzurik. ondo ulertu ezkero, geure burua itxartzeko, Jainkoa geure ondoan sumatzeko eta, Jesusegaz batera, Jainkoagan Aita-Ama aurkitzeko eta haregaz konfiantzazko hartu-emonak eukiteko.

     Baina Jainko hori ezin erabili geike inork bildurtzeko, ez eta geure burua engainatzeko ere. Eta bai izango dogula poz-iturri maitatuak garala sumatuko dogulako.

     Geuretuko ete dogu Jesusek iragarten deuskun Jainkoa, ala, nahiago izanik erabili daiteken Jainkoa, lehengotan jarraituko dogu, alperreko deiek eta eskariak egiten?

 

ABENDUALDIKO III. DOMEKEA "C"

Sarrera oharra

     Senideok: Abendualdian aurrera goaz, eta Jainkoagandik mezu pozgarria jatorku: seme-alaba aukeratuak gaitu; eta, bera poz-emoile danez, geu ere gure senideentzako poz-iturri izan gaitezala gura dau.

     Kezkaz eta atsekabez bizi gara, behar bada. Beharrezko dogu poza. Zabaldu deioguzan ateak poz-emoile dogun Jainkoari.

 

Sarrera abestia

Zatoz Jauna! Nausi bait da dirua:
  jendea maiz dauka zapaldua.
Entzun, Jauna, behartsuen oihua:
  Etor bedi zure erreinua!

Zatoz, Jauna! Hor gabiltza gauez gau:
  piztu gugan fedearen sua.
Zatoz, Jauna! Argi ezazu mundu hau:
  Etor bedi zure erreinua!

____________

Damu-otoitza (Beherago, Abenduko Koroia)

       Poza beste iturri batzutan bilatzeak iluntzen gaitu eta atsekabetzen. Jo daigun Jainkoaren errukira, poz-iturrira:

       —Jesus Jauna, Guretzako Barri On zarana, erruki, Jauna.
       —Jesus Jauna, Jainkoaren poza dakarskuzuna, Kristo, erruki.
       —Jesus Jauna, poz-emoile egiten gaituzuna, erruki, Jauna.

_______________

Abenduko koroia (egiten ez bada, gorago damu-otoitza)

     Hirugarren kandela hau bizterakoan, Jauna, poz-emoile izateko gure gogoa biztu daizula eskatzen deutsugu; gure gizarte honek behar dauzan alaitasunaren gaurko autorleak sustatu daizuzala gure artean.

     (3. kandelea bizten dan bitartean, abestu:)

 

 

     Itxaropenaren Jainkoak bere Semearen mahai ingurura ekarri gaitu. Egun baten aintzazko mahai ederrean alkartu gaizala, zorionaren betetasunean.

     AMEN.

 

Lehenengo irakurgaiari  So 3, 14-18a

     Atsekabe handietatik urten izanaren esperientziak atsekabe barriak gainditzeko itxaropena emoten dau. Eta profetek horren barri emon gura deutsoe herriari: Jainkoak bere herriaren poza gura daualako.

 

Erantzun salmoa  Is 12, 2. 3 eta 4bcd...

R/. Egin poz-oihu
     handikiro dihardu-eta
     zuen alde Israelgo Santuak.

 

Bigarren irakurgaiari   Flp 4, 4-7

     Gure  pozaren iturria Jainkoaren hurtasuna sumatzea dala dinosku Paulok. Baina gure poztasun-iturriak osasuna, kontsumoa eta zalapartea badira… non jausiko ete dira hitzok?

 

Ebanjelioari   Lk 3, 10-18

     Adi Bateatzailearen mezuari: Mesiasi bidea egiteak gure bizikerea eta jokabideak aldatzea eskatzen dau; erantzun morala baino harago doan aldakuntzea da hau. Egin deiogun harrerea Aleluia abestuz, zutunik.

 

Herri-otoitza

     † Izurrite aldi honetan hainbeste dagoz triste, atsekabez, bururik jaso ezinda. Izan daiguzan gogoan eskariok egiterakoan:

     —Eleiza amaren alde: leku guztietan zabaldu daian Jainko poztasuna, batez ere etsita dagozanen artean, egin daigun otoitz.

     —Izurrite honek jota, gaisorik aurkitzen diranen alde: esker oneko agertu daitezan euren zaintzaileekaz, egin daigun otoitz.

     —Gaisoen zaintzan, euren osasuna ere arriskuan jarten dabenek, somatu daien Jainkoa ondo-ondoan, adore eta poz-emoile lez, egin daigun otoitz.

     —Eleiz alkarte honen alde: gero eta urriagoak eta gitxiago dirala ikusteak ez daizan tristetu, egoera bardinean dagozanekaz bat egin baino, sinisten dabenaren lekuko, egin daigun otoitz.

     † Biztu gugan esker ona, Jauna, pozten gaituan erregalu lez hartu daigun bizitzak dakarskun guztia. Jesu Kristo…

 

Jaunartzerako

Zatoz, Jauna, zatoz lurrera
zure herri hau salbatzera. 

¹ Bakea ta justizia bialdu mundura, Jauna;
zure jaiotzak gugana bekar poza, zoriona.

² Okerretatik zuzendu, gaitz bideetatik aldendu,
gure kateak apurtu (urratu), bide ilunak argitu.

³ Gorroto-bideetatik aldendu gagizuz, Jauna;
alkar parkatu dagigun emoiguzu maitasuna.

 

 Amaieran

     Aldi ilunen aurrean aurpegi alaia ipini behar dala esaten da. Badaukagu arrazoirik Jainkoagandiko errekadua hartu  dogunok poz-emoile izateko, ha geugaz dago-eta. Bateatzaileak lez, autortu daigun Jainkoa dogula poz-iturri.